وەزارەتی كارەبای حكومەتی هەرێم کوردستان لەبارەی كەمبوونەوەی بڕی بەرهەمهێنانی كارەبا ڕاگەیەندراوێكی بڵاوكردەوە.
لە ڕاگەیەندراوەكەدا هاتووە، پڕۆسەی چاكسازیی بۆ ژێرخانی کارەبا لەلایەن تیمەکانمان و كۆمپانیای داناگاز بەردەوامە، بۆیە بەرهەمهێنانی گاز بە بڕی 150 ملیۆن پێ سێجا كەمی كردووە، بەمەش بەرهەمهێنانی كارەبا بە بڕی 800 مێگاوات دابەزیوە و هەندێ جار كارەبا بۆ ماوەیەكی كەم دەبڕێت.
وەزارەتی کارەبا ڕاشیگەیاند: وەزارەتەكەمان لەگەڵ وەزارەتی سامانە سرووشتییەكان لەسەر هێڵن بۆ چارەسەرکردنی ئەم بابەتە لە ماوەی دوو ڕۆژی داهاتوودا و هەوڵ دەدرێت ئەم پڕۆسەیە كەمترین كاریگەری لەسەر تۆڕی كارەبای نیشتمانی هەبێت.
ئەوەش لەكاتێكدایە، لە ڕۆژی 20ی ئەم مانگەوە بڕی بەرهەمهێنانی كارەبا لە هەرێمی كوردستان كەمیكردووە.
