دەقی هەواڵ
کۆچبەر – Slemani Daily
نەتەوە یەکگرتووەکان ئامارێکی شۆکهێنەری دەربارەی گیانلەدەستدان و بێسەروشوێنبوونی کۆچبەران بڵاوکردەوە و ڕایگەیاند؛ تەنها لە ساڵی ڕابردوودا نزیکەی 8 هەزار کەس لە ڕێگاکانی کۆچبەریدا گیانیان لەدەستداوە، کە زۆربەیان لە ڕێڕەوە دەریایییەکانی بەرەو ئەوروپا بوونەتە قوربانی.
بەپێی ڕاپۆرتە نوێیەکەی نەتەوە یەکگرتووەکان کە ڕۆژی سێشەممە بڵاوکراوەتەوە، ڕێگاکانی دەریا بەرەو کیشوەری ئەوروپا وەک “کوشندەترین ڕێڕەو” ناوزەند کراون. ڕاپۆرتەکە جەخت لەوە دەکاتەوە کە بەشێکی زۆری ئەم قوربانییانە لەو بەلەمانەدا بوون کە بە “کەشتییە نوقمبووە نادیارەکان” ناسراون؛ ئەوانەی کە بەبێ بەجێهێشتنی هیچ شوێنەوارێک لەناو دەریادا نقوم دەبن و هیچ زانیارییەکیان لەسەر تۆمار ناکرێت، ئەمەش وای کردووە ئامارەکان لەوەی ڕاگەیەندراوە ترسناکتر بن.
قەیرانی کۆچبەران لە ساڵانی ڕابردوودا بەهۆی جەنگ، ناسەقامگیری سیاسی و خراپیی باری دارایی لە وڵاتانی ڕۆژهەڵاتی ناوەڕاست و ئەفریقا زیادی کردووە. ڕێکخراوە مرۆیییەکان بەردەوام هۆشداری دەدەن کە توندکردنەوەی ڕێکارە سنوورییەکان و نەبوونی ڕێڕەوی یاسایی، کۆچبەران ناچار دەکات ڕێگەی مەترسیدار بگرنە بەر و خۆیان بخەنە دەست باندەکانی قاچاغی مرۆڤ، کە زۆرجار بەلەمەکان لە ئاستی ئەو شەپۆلە توندانەدا نین و دەبنە هۆی کارەساتی مرۆیی گەورە.
