دەقی هەواڵ
پێشمەرگەیەک گیانی لەدەستدا ــ Slemani Daily
بەرەبەیانی ئەمڕۆ، هاووڵاتییەک لە کاتی کۆکردنەوەی گیای بەهاری لە کوێستانەکانی بناری قەندیل، لە بەرزاییەکەوە کەوتە خوارەوە و دەستبەجێ گیانی لەدەستدا.
بەپێی زانیارییەکان، کاتژمێر 3:00ـی بەرەبەیانی ئەمڕۆ، هاووڵاتییەک بە ناوی (عومەر حاجی حەمەسووری) کە تەمەنی 50 ساڵە، پیشەی پێشمەرگەیە و خاوەنی شەش منداڵە، بە مەبەستی کۆکردنەوەی گیای کوێستانی (جاترە) چووەتە بەرزاییەکانی بناری قەندیل، بەڵام لە کاتی سەرکەوتنیدا لە بەرزاییەکەوە کەوتووەتە خوارەوە و بەهۆی سەختی برینەکەیەوە گیانی لەدەستداوە.
ساڵانە لەگەڵ هاتنی وەرزی بەهار و هاویندا، ژمارەیەکی زۆر لە هاووڵاتیانی هەرێمی کوردستان ڕوودەکەنە ناوچە شاخاوییەکان و کوێستانە بەرزەکان بە مەبەستی کۆکردنەوەی گیا بەهاری و دەرمانییەکان (وەک جاترە، ڕێواس، کەنکەر و لۆشان)، بەڵام بەهۆی سەختی و هەڵدێری شاخەکان و هەندێکجاریش بوونی پاشماوەی مین، ساڵانە چەندین ڕووداوی نەخوازراوی هاوشێوە لەو ناوچانەدا تۆمار دەکرێن و دەبنە هۆی گیانلەدەستدان یان برینداربوونی هاووڵاتیان.
