دەقی هەواڵ
مووچە ــ Slemani Daily
وەزارەتی دارایی و ئابووریی حکومەتی هەرێمی کوردستان خشتەی نوێی دابەشکردنی مووچەی مانگی ئایاری بۆ مامۆستایان و فەرمانبەرانی گرێبەست، هەمیشەیی و ئەو کەسانەی لەسەر داهاتی ناوخۆ تەمویل دەکرێن ڕاگەیاند، پرۆسەکەش لە ناوەڕاستی ئەم هەفتەیەوە دەستپێدەکات و چەند ڕۆژێک بەردەوام دەبێت.
بەپێی ڕاگەیەندراوی فەرمی وەزارەتی دارایی، پرۆسەی دابەشکردنی مووچە لە ڕۆژی یەکشەممە 21ی حوزەیرانی 2026 دەستپێدەکات و تا ڕۆژی پێنجشەممە 25ی حوزەیران بەردەوام دەبێت، ئەم بڕیارە بە پلەی یەکەم مامۆستایانی گرێبەست لە هەردوو وەزارەتی پەروەردە و وەزارەتی خوێندنی باڵا و توێژینەوەی زانستی دەگرێتەوە، لەگەڵ تەواوی ئەو فەرمانبەرە گرێبەستانەی کە شایستە داراییەکانیان لەسەر بنەمای داهاتی ناوخۆ دابین دەکرێت. هاوکات بڕیارەکە سەرجەم ئەو فەرمانبەرە گرێبەست و هەمیشەییانەش دەگرێتەوە کە لە دوای ڕێکەوتی ١ی تەمموزی 2024ەوە لەسەر میلاکی دامودەزگاکانی حکومەتی هەرێم دامەزراون و مووچەکانیان لەسەر داهاتی ناوخۆیی هەرێم خەرج دەکرێت.
بابەتی شایستە داراییەکان و مووچەی فەرمانبەرانی هەرێمی کوردستان، بەتایبەت ئەوانەی تەمویلەکەیان بەستراوەتەوە بە داهاتی ناوخۆیی یان لە دوای نیوەی دووەمی ساڵی 2024ەوە دامەزراون، هەمیشە یەکێک بووە لە پرسە جێی بایەخەکان. وەزارەتی دارایی لە ڕێگەی ڕێکخستنی ئەم خشتەیەوە کار دەکات بۆ ڕێکخستنەوەی شایستەی دارایی ئەو توێژانەی کە ڕاستەوخۆ پشت بە داهاتە ناوخۆییەکانی هەرێمی کوردستان دەبەستن، بە ئامانجی ڕێگریکردن لە هەر دواکەوتنێکی زیاتر لە دابەشکردنی مووچەکانیاندا.
