خانەنشینبوون – Slmani Daily
لیژنەی ئاسایش و بەرگری لە ئەنجوومەنی نوێنەرانی عێراق کار لەسەر هەموارکردنەوەی یاسای خزمەت و خانەنشینی هێزەکانی ئاسایشی ناوەخۆ دەکات، بە مەبەستی کەمکردنەوەی تەمەنی خانەنشینی ئارەزوومەندانە لە 45 ساڵەوە بۆ 40 ساڵ، بەڵام باری دارایی حکوومەت ڕەنگە ببێتە ڕێگر لە جێبەجێکردنی.
مازن غەریب، ئەندامی لیژنەی ئاسایش و بەرگریی لە ئەنجوومەنی نوێنەرانی عێراق رایگەیاند؛ ئامانج لە هەموارکردنەوەی یاسای ژمارە 18ی ساڵی 2011ی هێزەکانی ناوەخۆ، رێکخستنەوەی رێڕەوی پیشەیی ئەفسەران و کارمەندان و چارەسەرکردنی کێشەکانی پلەبەرزکردنەوە و خانەنشینییە. ئاماژەی بەوەش کرد، خوێندنەوەی یەکەم بۆ پڕۆژەیاساکە کراوە، بەڵام کاتی خوێندنەوەی دووەم هێشتا دیارنییە.
گۆڕانکارییە سەرەکییەکانی ناو هەموارەکە بریتیین لە:
تەمەنی خانەنشینی: کەمکردنەوەی تەمەنی خانەنشینی ئارەزوومەندانە بۆ 40 ساڵ (بە مەرجی هەبوونی 15 ساڵ خزمەت).
بەرزکردنەوەی بڕوانامە: هەژمارکردنی بڕوانامەکانی ماستەر و دکتۆرا وەک پێشخستنی ساڵانی خزمەت (ترقیە).
هاوكات هۆشداری درا لەوەی ئاستەنگە داراییەکان و بارگرانی لەسەر بودجەی گشتی ڕەنگە ببێتە هۆی دواکەوتنی جێبەجێکردنی ئەو بڕگانەی پێویستیان بە تەرخانکردنی دارایی هەیە.
بەپێی یاسای ئێستای خزمەت و خانەنشینی هێزەکانی ئاسایشی ناوەخۆ (ژمارە 18ی ساڵی 2011)، هەر ئەفسەر یان کارمەندێک تەنیا لە کاتێکدا دەتوانێت بە ئارەزوومەندانە خانەنشین بێت کە 15 ساڵ خزمەت و 45 ساڵ تەمەنی تەواو کردبێت. هەموارکردنەوەی ئەم یاسایە لە چوارچێوەی هەوڵەکانی پەرلەماندا دێت بۆ چاکسازی لە کەرتە ئەمنییەکان و دابینکردنی ژیانێکی شایستەتر بۆ کارمەندانی هێزەکانی ناوەخۆ.
