دەقی هەواڵ
کەش و هەوا- Slemani Daily
بەڕێوەبەرایەتیی گشتیی کەشناسی و بومەلەرزەزانیی هەرێمی کوردستان، پێشبینییەکانی کەشوهەوای بۆ 48 کاتژمێری داهاتوو بڵاوکردەوە و ڕایگەیاند کە پلەکانی گەرما بەردەوام دەبن لە بەرزبوونەوە، هاوکات لە ناوچە شاخاوییە سنوورییەکانیش ئەگەری بارینی تاوە بارانێکی کەم هەیە.
بەپێی ڕاپۆرتی کەشناسی، ئاسمانی ئەمڕۆ و سبەی هەرێم بە گشتی ساماڵ و پەڵە هەور دەبێت، بەڵام لە سنووری پارێزگای دهۆک و ئیدارەکانی زاخۆ و سۆران لە کاتەکانی دوای نیوەڕۆدا دەگۆڕێت بۆ نیمچە هەور.
خێرایی با لە نێوان 10 بۆ 20 کیلۆمەتر لە کاتژمێرێکدا دەبێت و ئاراستەکەی بەرەو باکووری ڕۆژئاوا دەبێت، کە لە هەندێک ناوچەدا چالاک دەبێت بۆ سەرووی 30 کم/ک. هاوکات مەودای بینین لە نێوان 8 بۆ 10 کیلۆمەتردا جێگیر دەبێت.
پلەکانی گەرما لە شارەکاندا بەم شێوەیە دەبن:
هەولێر، چەمچەماڵ، زاخۆ: 36 بۆ 37 پلەی سیلیزی.
سلێمانی، دهۆک: 35 بۆ 36 پلەی سیلیزی.
هەڵەبجە: 37 پلەی سیلیزی بۆ هەردوو ڕۆژەکە.
ئەم شەپۆلی بەرزبوونەوەی پلەکانی گەرمایە لە کاتێکدایە کە ناوچەی گەرمیان بەرزترین ڕێژە تۆمار دەکات کە دەگاتە 42 بۆ 43 پلەی سیلیزی، لە بەرامبەریشدا ناوچە شاخاوییە گەشتیارییەکانی وەک حاجی ئۆمەران نزمترین پلەی گەرمایان تێدا تۆمار دەکرێت کە لە نێوان 25 بۆ 26 پلەی سیلیزیدایە، ئەمەش هاوسەنگیی جیاوازیی کەشوهەوای وەرزەکە لە نێوان ناوچە دەشتایی و شاخاوییەکانی هەرێمدا نیشان دەدات.
