42 گەنجی کۆچبەری کورد لە کەناراوەکانی لیبیا لەلایەن گرووپە چەکدارەکانەوە دەستگیر کراون و چارەنوسیان نادیارە.
رۆژی 9ی ئەم مانگە، 42 گەنجی کورد کە زۆربەیان خەڵکی دەڤەری ڕاپەرینن لە تەرابلوسەوە ویستوویانە بە رێگەی دەریایی بەرەو ئەورووپا کۆچ بکەن، لەلایەن گرووپە چەکدارەکانەوە دەستگیر کراون و تاوەکو ئێستا چارەنوسیان نادیارە.
کەس و کاری گەنجە دەستگیرکراوەکان ڕایانگەیاند: منداڵەکانمان لە لیبیا زیندانی کراون و بارودۆخیان زۆر خراپە و داوای بەهاناوەچوون دەکەن.
ماوەی زیاتر لە ساڵێکە رێگەی کۆچی نایاسایی لە رێگەی وڵاتانی تونس و لیبیاوە بۆ ئەورووپا لەلایەن گەنجانی هەرێمی کوردستانەوە دەگیرێتەبەر، ئەمەش سەرەڕای مەترسییە زۆرەکانی ئەو رێگایە بەشێکی زۆریان لە لایەن گرووپە چەکدارەکانەوە دەستگردەکرێن و زیندانی دەکرێن.
بەپێی ئاماری کۆمەڵەی پەنابەرە گەڕاوەکانی ئەورووپا، لە ساڵی 2025, زیاتر لە 6500 هاووڵاتی هەرێمی کوردستان کۆچیان بۆ دەرەوەی وڵات کردووە، کە نزیکەی 1500 کەسیان خەڵکی ئیدارەی راپەڕین بوون.
