گەنجێک لەنێو بازار کوژرا – Slemani Daily
دەقی هەواڵ
گەنجێکی تەمەن 19 ساڵان لە هەڵەبجە، لە کاتی ناوبژیوانی کردنی شەڕەچەقۆیەکدا بە سەختی بریندار کرا و لە نەخۆشخانە گیانی لەدەستدا؛ پۆلیسی شارەکەش دەستگیرکردنی تۆمەتباری سەرەکیی ڕووداوەکەی بەپێی مادەی کوشتنی ئەنقەست ڕاگەیاند.
پۆلیسی پارێزگای هەڵەبجە ئاشکرای کرد کە دوای ڕووداوێکی شەڕەچەقۆ لە ناوبازاڕی شارەکەدا، گەنجێک بەهۆی سەختیی برینەکەیەوە گیانی لەدەستداوە.
بەرەبەیانی 27ی ئەیلوول لە ناوبازاڕی هەڵەبجە شەڕ لە نێوان سێ کەسدا ڕوویدابوو؛ لەو میانەیەدا گەنجێک بە ناوی (ڕەهەند شاهۆ عەلی) تەمەن 19 ساڵ، لە کاتی هەوڵدانیدا بۆ ناوبژیوانی و هێورکردنەوەی دۆخەکە لە نێوان بەشەڕهاتووەکاندا، بە چەقۆ بریندار کرا.
ڕائید ئاکام قوتبەدین ئاغاوەیس، گوتەبێژی پۆلیسی هەڵەبجە ئاماژەی بەوە کرد کە ڕەهەند بەهۆی خراپیی بارودۆخی تەندروستییەوە بەپەلە ڕەوانەی نەخۆشخانەی سلێمانی کرا، بەڵام بەرەبەیانی 28ی ئەیلوول بەهۆی سەختی برینەکەیەوە گیانی لەدەستدا. سەبارەت بە ڕێکارە ئەمنییەکان، پۆلیسی هەڵەبجە ئاشکرای کرد کە تۆمەتباری سەرەکی کە گەنجێکی تەمەن 26 ساڵە دەستگیر کراوە و بە بڕیاری دادوەر و بەپێی مادەی 406 لە یاسای سزادانی عێراقی، پەڕاوی لێکۆڵینەوەی بۆ کراوەتەوە.
مادەی 406 لە یاسای سزادانی عێراقی تایبەتە بە تاوانی کوشتنی ئەنقەست، کە سزاکەی لەنێوان بەندکردنی هەتاهەتایی یان سێدارەداندایە. دووبارەبوونەوەی هەڵگرتنی چەک و چەقۆ لە شوێنە گشتییەکاندا نیگەرانیی لای هاووڵاتییان دروستکردووە، لە کاتێکدا دەزگا ئەمنییەکان جەخت لە توندکردنەوەی ڕێکارە یاساییەکان دەکەنەوە بەرامبەر ئەو کەسانەی ئارامیی بازاڕ و گیانی هاووڵاتییان دەخەنە مەترسییەوە.
