دەقی هەواڵ
گشتی ـ Slemani Daily
وەزارەتی پەروەردە بە فەرمی ئەو دەنگۆیانەی ڕەتکردەوە کە باس لە ئەنجامدانی تاقیکردنەوەکان بە شێوازی ئۆنلاین دەکەن، و دڵنیایی دەداتە قوتابیانی پۆلی نۆی بنەڕەتی و دوانزەی ئامادەیی کە تاقیکردنەوەکانی کۆتایی ساڵ بە شێوازی ناوەند و ئامادەبوونی فیزیکی بەڕێوەدەچن.
بەرپرسانی پەروەردە ڕایانگەیاند کە پڕۆسەی ئەزموونەکان وەک ساڵانی ڕابردوو دەبێت و هیچ پلانێک بۆ گۆڕینی شێوازەکەی بۆ ئەلیکترۆنی لە ئارادا نییە. سەبارەت بە کاتی دەستپێکردنی تاقیکردنەوەکانیش، ئاماژە بەوە دراوە کە تاوەکو ئێستا بەرواری ورد و خشتەی تاقیکردنەوەکان دیاری نەکراوە و لە کاتێکی گونجاودا ڕادەگەیەنرێت.
ئەم ڕونکردنەوەیەی بەرپرسانی پەروەردە لە کاتێکدایە کە ساڵانە لەگەڵ نزیکبوونەوەی وەرزی تاقیکردنەوەکان، چەندین دەنگۆ لە سۆشیاڵ میدیا سەبارەت بە گۆڕانکاری لە سیستەمی تاقیکردنەوەکان و کاتەکانی بڵاودەبنەوە، ئەمەش دڵەڕاوکێ لای قوتابیان و خێزانەکانیان دروست دەکات.
