دادگای سلێمانی بڕیاری ئازادکردنی بۆ شاسوار عەبدولواحید سەرۆکی جوڵانەوەی نەوەی نوێ دەرکرد و ناوبراو دوای تەواوکردنی ڕێکارە یاساییەکان بە کەفالەت بە فەرمی ئازادکرا.
ئازادکردنی شاسوار عەبدولواحید دوای ئەوە هات کە تیمی پارێزەرانی توانییان لەبەردەم دادوەری لێکۆڵینەوەدا بەڵگەکان بخەنە ڕوو و داوای ئازادکردنی بکەن تا کاتی یەکلاکردنەوەی کۆتایی کەیسەکەی کە بەهۆیەوە ڕەوانەی دادگا کرابوو. پرۆسەی ئازادکردنەکە بە شێوەیەکی یاسایی و لە بەرامبەر پێشکەشکردنی کەفالەتێکی دارایی بووە کە دادگا وەک گرەنتییەک بۆ ئامادەبوونی ناوبراو لە دانیشتنەکانی داهاتوودا دیاری کردبوو، دوای واژۆکردنی نوسراوەکانیش ناوبراو بنکەی پۆلیسی بەجێهێشت. لە کاتی ئازادبوونەکەیدا ژمارەیەک لە هەواداران و سەرکردەکانی جوڵانەوەی نەوەی نوێ پێشوازییان لێکرد و تیمی یاساییەکەشی جەختیان کردەوە کە ئەوان بەردەوام دەبن لە بەرگریکردن لەو تۆمەتانەی ئاڕاستەی کراون.
شاسوار عەبدولواحید کە پێشتر وەک بازرگان ناسرابوو و دواتر جوڵانەوەی نەوەی نوێی دامەزراند چەندین جار بەهۆی چالاکییە سیاسییەکانی و ڕەخنەکانی لە دەسەڵات یان بەهۆی کێشە یاساییەکانی پەیوەست بە پڕۆژەکانی پێشووی ڕەوانەی دادگا کراوە و دەستبەسەر کراوە. ئەم دەستبەسەرکردنەی دواییشی کاردانەوەی زۆری لە میدیاکان و لای لایەنگرانی لێکەوتەوە کە وەک فشارێکی سیاسی دژی ئۆپۆزسیۆن وەسفیان دەکرد، بەڵام لایەنە حکومییەکان هەمیشە جەختیان لەوە کردۆتەوە کە کەیسەکان یاسایین و پەیوەندییان بە مافی گشتی یان سکاڵای تایبەتەوە هەیە.
