بافڵ تاڵەبانی، سەرۆکی یەکێتیی نیشتمانیی کوردستان لە دەباشان پێشوازیی لە غەریب حەسۆ، هاوسەرۆکی پارتی یەکێتیی دیموکرات (پەیەدە) و ساڵح موسلیم، ئەندامی دەستەی سەرۆکایەتیی پارتی یەکێتیی دیموکرات (پەیەدە) کرد.
لە دیدارێکدا کە دەرباز کۆسرەت ڕەسوڵ، لێپرسراوی مەکتەبی پەیوەندییەکان و سالار لالە سەرحەد، لێپرسراوی بەشی پەیوەندییە کوردستانییەکان ئامادەیبوون، نوێترین پێشهاتەکانی ڕۆژئاوای کوردستان و سووریا تاوتوێ کرا.
بافڵ تاڵەبانی پشتگیری یەکێتیی نیشتمانیی کوردستانی بۆ پاراستنی بەرژەوەندییەکانی کوردانی ڕۆژئاوای کوردستان، دووپات کردەوە، هاوکات، گوتی: “دەبێت مافی کورد لە سووریای نوێدا مسۆگەر بێت و وڵاتەکە بە هاوبەشیی هەموولایەک بەڕێوە بچێت و حکومەتی سووریا نوێنەرایەتیی هەموو پێکهاتەکان بکات.”
لای خۆیەوە، وەفدی پەیەدە سڵاوی بەڕێز مەزڵوم عەبدییان گەیاندە سەرۆکی یەکێتیی و پشتیوانی پەیەدە و هەسەدەیان جارێکی دیکە بۆی دووپات کردەوە.
